揀啱跑道，先有資格贏：港股、美股、大陸樓、英國樓同你自己
- officialcocogor
- 2025年11月15日
- 讀畢需時 5 分鐘
已更新：1月22日
點解有啲人好似好易贏錢，但好多人一講投資，就係「投資乜輸乜」，輸到最後索性唔敢再郁？我同身邊好多朋友傾，都聽到同一種無力感：1)唔識搞 2)試過幾次輸錢...慢慢就覺得投資「唔屬於自己」到底問題喺邊？
一、先問清楚：你究竟揀咗咩「賽道」？
呢幾年，香港股市同環球其他市場，其實係兩個世界：
港股 | 美股 |
|
|
但一到有事發生（例如當時嘅武漢肺炎、停市），香港人第一反應永遠係：
「開市之後會跌 800 點？定 1500 點？」
問嘅問題永遠係短線、情緒、點數，好少有人退一步問：
「其實我點解要死守喺港股呢條跑道度搏殺？」
二、F1 跑車 vs 單車：問題唔喺部車，係條路
想像有兩架車：
一架係 F1 跑車，極速 300km/h
一架係普通單車，仲要係你親自踏
直覺一定會答：「梗係 F1 快過單車啦！」,但你忽略咗一個關鍵變數：條賽道。
如果：F1 要喺一條爛到爆、石春路、坑渠路行; 單車喺一條筆直、平滑嘅康莊大道上面踩
你再諗諗：邊個先真正有機會安全、穩陣咁到終點？
F1 喺爛路 | 單車喺直路： |
|
|
投資都一樣：
市場 = 賽道
你嘅能力／策略 = 架車你就算有 F1 嘅野心，但揀錯賽道，最後都只係喺泥地度打冷震。
三、港股 vs 美股：一個喺泥漿摔角，一個係自動扶手電梯
好多人堅持留喺港股：學期權, 學指數期貨, 買乜「XX 號碼股」、報名上咩高級班、學九十幾個 technical signal,結果玩到好似泥漿摔角，搏到身水身汗，都未必有着數。反而美股呢邊：好多大型公司,業務清晰、現金流穩陣、受惠全球經濟／科技浪潮.
我自己做法反而好簡單
買入：Visa/ Mastercard/ Tesla 呢啲自己每日都用、見到嘅公司買完基本上就「瞓覺」，唔日炒。例如 Visa：當年7X美金買,而家去到200蚊美金左右,中間唔係日日坐喺度盯實個盤。
係揀啱賽道，揀啱公司，之後俾時間幫你做嘢你未必拎到全世界最勁嗰隻，但你係揀咗一條 「向上行嘅自動扶手電梯」。
四、「勢」先係真大佬：順勢 vs 逆勢
其實好耐之前我都講過，投資講到最後，真係得三個字：食個勢。
勢向上（UP） | 勢向下（DOWN) |
|
|
香港樓市：過去十幾年，喺超低息年代加上供應少,個勢係一路向上，好多買樓收租的人其實都係「坐順風車」，你當年肯咬牙上車 → 之後就係升值、收租疊加。
大陸樓：我自己喺中山、內地城市都有買過，早幾年都係食過一輪升浪，但之後感覺「勢已經唔對路」，我揀咗 逐步離場。
英國樓：英鎊喺相對低位，樓價長期緩慢上升，未出現誇張泡沫。某啲城市租金回報可以做到 7–10 厘，甚至再高，對比之下，係一條 「新但有潛質嘅跑道」
所以，唔好淨係問「買咩」，先問清楚：
「呢個地方、呢個市場，個勢係上定落？」五、大陸樓實戰：點樣喺武漢肺炎前走得切？
講少少我自己大陸樓嘅故事。我喺中山有層樓，本來升咗差唔多兩倍，後來市況轉弱，已經回落咗一大截，剩返大約一倍左右利潤。
嗰陣我心裏面諗：「要唔要再等下？一帶一路？大灣區？可能仲有得升？」
直到2019 年尾、2020 年頭，開始聽到武漢肺炎消息，我嗰刻嘅感覺係：「呢單嘢如果爆大，一定重創中國經濟。」
於是我做咗兩件事：
即刻全面放盤
請晒所有 agent 幫手推 願意減價出貨
接受「可能賣到無乜利潤」呢個現實
最後嗰單 deal，我基本上「無乜錢賺，仲要貼少少手續費」
但換到嘅係資金返到自己手唔需要喺一個我睇唔透嘅風險入面捱。
簽約嗰日： 我同 yannas 戴住口罩上中山 地方嗰邊仲未意識到疫情嚴重性 我心諗：「唔理咁多，總之先走咗為上。」
而家回頭睇，中國經濟、內房、地方樓市真係入咗寒冬。早幾個月果個決定，事後睇係啱嘅。呢度想講嘅唔係我幾神準，而係：
你要肯認個勢變咗，有時寧願少賺、甚至唔賺，
都要識得「轉跑道」。六、英國樓：另一條我準備踩落去嘅賽道
講少少英國樓，我自己而家仲係「研究緊＋篩選盤」階段， 吸引我嘅原因幾個：
歷史走勢：冇好似香港、大陸咁誇張爆升，偏向穩定慢升
現階段匯率：英鎊相對低位，用港幣買入等於平咗 20–30%
租金回報：好多地方可以做到 7–10% 收益 如果再配合簡單改裝、細心經營，有機會做到更高 yield
我為咗搞清楚背景， 上過一啲專講英國樓嘅課，用幾百蚊聽人講一日，睇晒前世今生、類型、區域分布、風險位
利申： 到而家我仲未真係落訂買英國樓，原因唔係覺得唔掂，而係仲未遇到心水盤，自己都一樣有拖延症
呢度都係想 highlight：
就算你覺得條賽道啱，都唔好盲衝，
盤唔啱、價唔啱，寧願等多陣。七、唔好做羊群：揀車、揀路、揀你 handle 到嘅工具
無論係：
港股
美股
香港樓
大陸樓
英國樓
我覺得每個人都應該問自己幾個問題：
呢條賽道個勢係點？
長期上升？ 長期橫行？ 已經見頂回落？
我有冇能力 handle 呢件工具？
你係咪真係識玩期權？ 你頂唔頂得順 Tesla 喺你面前由 200 升到 300、400、500，仲夠膽入？
我係咪淨係因為「見人哋贏」而心動？
別人贏錢嗰刻背後係咪只係「運氣」？ 定係人哋其實做咗好多功課、揸住大勢順風船？
記住：
你贏錢唔會分俾我，
你輸錢都唔應該怪我。所有投資決定，最後都係你自己揀嗰條路。
八、最後：每個人都要搵番自己「夠力踩」嗰架車
我成篇文想講嘅，其實係世界上有 F1 跑車、有單車、有電單車、有貨車，每一種工具，都有適合場地同使用者，無必然好與唔好，得啱唔啱你
你未必要：
追最勁嘅升幅玩
最複雜嘅金融產品
但你起碼可以：
避開啲明知個勢唔掂、長期唔起色嘅市場
唔好死守喺一個「十年唔郁」嘅 index 度搏殺
肯試吓用一個鐘頭開個美股／海外戶口，起碼比自己多一條跑道揀
你而家用緊咩車？踩緊咩路？值唔值得停一停，問吓自己：
1.條路啱唔啱我？
2.勢向上定向下？
3.我係咪只係喺泥地度踩到滿身泥？
留言