業主賺錢的秘密：十年後先知自己原來一直默默變有錢（上）
- officialcocogor
- 11月14日
- 讀畢需時 4 分鐘
細個成日覺得，做業主好慘喎——要儲首期、又要每個月供按揭、去到月尾又冇錢剩，仲要扮開心同朋友講自己係「樓奴」。
相反租樓好似好瀟灑：每個月俾筆錢就算，唔使拎幾十萬出嚟，仲可以成日飛日本、飛歐洲、買靚手袋。
但係，我真心講句：如果你未買過樓，如果你一直租樓，你係永遠唔會明白點解「業主先至係真正日日賺」。
我自己都係捱咗好多年、每個月卡住喺度咁供供供，直到有一日無聊望吓銀行戶口，先「嘭」一聲醒晒：
原來業主係咁樣賺錢㗎？原來啲錢係「唔知唔覺溜咗入你嘅戶口」㗎？
如果我早十幾年識，Margaret 今日可能唔使喊，我都可能已經有錢好多好多。
所以今日寫呢篇 blog，就係想用最直接嘅方法同你分享：點解買樓——尤其自住——真係會令你嘅財務人生完全唔同。
今集主力講六大秘密入面嘅「頭三個」。
租樓、供樓、同阿媽住：三條人生路，三個完全唔同嘅結果
1. 租樓：短期爽，長期傷
租樓最大好處係——唔使儲首期、唔使一次過拎 100 幾十萬。
你會覺得：「每個月交租就算啦，手上仲有好多現金，可以周圍飛、買靚袋，人生幾開心呀。」
表面係嘅。但係，租金通常唔會比供樓平，仲會年年加。你租得幾耐，就幫業主儲咗幾耐嘅錢。
十年一萬租金，你送咗 $120 萬俾佢。二十年，你送咗 $240 萬俾佢。呢啲錢永遠唔會返到你身上。
2. 供樓：頭十年辛苦，之後愈住愈輕鬆
供樓大家最驚係乜？就係——壓力大。
要儲首期、要供按揭、頭幾年真係唔使諗旅行，更加唔好諗奢侈品。
我當你：
頭 5 年儲首期
之後 5 年開始供樓
十年真係辛苦期
但捱過呢十年，你會發現：
人工升咗
供款數額冇變
你生活開始鬆動
同時間，租金一路飆升，租樓嘅人就愈住愈緊。
供樓 vs 租樓十年後兩條線就會開始分叉。
3. 同阿媽住：最幸福嘅捷徑
如果你仲有幸可以同家人一齊住，你要知——其實你父母一直幫你供住幾千蚊一個月。
自己搬出去住先知：
管理＋差餉：$3,000 起
水電煤＋雜費：$3,000 起
仲未計租金／供款
每個月 $6-7,000 係最低消費，租金另計。
如果你想買樓：搬返同父母住﹣﹣真係最實際嘅「秘技」。陪屋企多幾年，順便儲多筆首期，將錢留返比自己嘅未來。
業主賺錢秘密（上集）
今集講三個最重要嘅概念：
Re-mortgage 翻按
還利息 vs 花清光
通脹幫你供樓
呢三樣嘢租樓人士係永遠享受唔到。
秘密一：Re-mortgage（翻按）——十年後銀行會自動還錢俾你
我用一個最簡單嘅例子講：
假設：
租金：$10,000／月
供樓：$10,000／月
你會話：「咁都係一萬蚊，點解我要儲首期咁辛苦？」
但其實供樓一萬蚊入面，分兩部分：
利息 $2,000–$4,000（真係支出）
本金 $6,000–$8,000（係你儲返嘅資產）
我用平均數：$7,000／月「變咗你層樓嘅資產」。
計落：
一年 $84,000
十年 $840,000
然後十年後你同銀行講一句：
「我還咗八十幾萬本金，我想翻按可唔可以？」
銀行通常會話：OK。你就可以一次過拎番出去。（未計樓價升值）
十年租樓？你就係：十年送 $120 萬俾業主。
十年供樓？你睇住自己攞番 $840,000 出嚟用。
差距大到離譜。
秘密二：還利息 vs 花清光——表面數字一樣，本質差 180 度
租樓 $10,000供樓 $10,000
表面好似平等但實際係：
租樓：$10,000 全部「消費」
供樓：$7,000 係「儲蓄」、$3,000 係支出
30 年後：
供樓：累積資產二百幾萬
租樓：流走二百幾萬
一樣係 $10,000／月，但方向係相反嘅。
秘密三：通脹係你嘅朋友 —— 租金係敵人、按揭係盟友
以前雲吞麵幾毫子一碗。十幾年前午餐 $25。而家大家樂叉燒飯 $38，杯凍飲 +$9。
租金一樣係年年加。
紅磡為例：
十幾年前：$10,000 以下
今日：$20,000–$25,000
但按揭供款呢？
三十年一樣價錢。
你人工升租樓人士租金升但供樓嘅人供款唔升
十年後差距會越拉越遠。
三十年後更加誇張：
供樓：供完，$0 住自己嘅樓
租樓：第 31 年、第 51 年都繼續要交租
租樓係一輩子嘅成本供樓係三十年嘅成本。
尾段：你有咩買樓 concept？
我自己唔係大地主，只係一個普通小業主。呢啲道理係幾年前先明，所以輸咗好多年。
如果你而家仲未買樓、或者仲猶豫：希望呢篇 blog 會令你對「供樓 vs 租樓」有更深理解。
如果你本身有幾間樓、又或者有你自己嘅買樓哲學，歡迎喺留言同我分享。
下一篇我會講：
點解買樓比買股票易贏？
點解股票咁多人輸、買樓反而十個有八個贏？
點解買樓「長期100%贏」？
點解牛頭角順嫂都可以贏？
想睇就記得 follow。
留言